Mercedes-Benz-მა სექტემბერიც პირწმინდად მოიგო და BMW მორიგ ჯერზე დაამარცხა

მსოფლიოს პრემიუმსეგმეტნის ლიდერმა კომპანიებმა სექტემბრის თვის გაყიდვების მაჩვენებლების შესახებ ინფორმაცია გაავრცელეს. აღსანიშანვია, რომ ამ სეგმენტის ლიდერ სამეულ კომპანიას, სამივეს წინა წლის ანალოგიურ თვესთან შედარებით ზრდა უფიქსირდება. „გერმანული სამეული“ კვლავ სეგმენტის ლიდერად რჩება, თუმცა თავად მათ შორის კონკურენციაც წლიდან წლამდე მძაფრდება, განსაკუთრებით ეს თვალშისაცემია Mercedes-Benz-სა და BMW-ს გაყიდვებს შორის.

სექტემბრის მონაცემებით Mercedes-Benz-მა 223,838 მსუბუქი ავტომობილი გაყიდა, რაც წინა წლის ანალოგიურ პერიოდზე +10.4%-თ მეტია და ის ერთადერთია ამ სამეულს შორის, რომელსაც ორნიშნა ზრდა დაუფიქსირდა. ჯამში, კომპანიას მიმდინარე წლის პირველ 9 თვეში გაყიდული აქვს 

1,725,243 ავტომობილი და ამ ციფრებში რა თქმა უნდა, არ შედის არც კომერციული დანიშნულების მანქანების და არც სატვირთოების გაყიდვები, რომელიც ამ ბრენდის ლოგოს ქვეშ გამოდის. ასევე არ ირიცხება მისი კუთვნილი Smart ბრენდის გაყიდვები. წინა წელთან შედარებით კომპანიის გაყიდვების ზრდა +0.6%-ია.

რაც შეეხება კონკურენტ BMW-ს, მისი გაყიდვებიც გაიზარდა, ოღონდ +4.8%-ით და  210,427 ერთეული შეადგინა. ბავარიულმა კომპანიამ მიმდინარე წლის სექტემბრის ჩათვლით 1,601,397 მსუბუქი ავტომობილი გაყიდა, რაც წინა წელზე  +2.2%-ით მეტია. ამ ციფრებში ასევე არ შედის მათი კუთვნილი ბრიტანული ბრენდების გაყიდვები.

რაც შეეხება სამეულის მესამე წარმომადგენელს, მისი გაყიდვები კონკურენტებისას 

მნიშვნელოვნად ჩამორჩება, თუმცა სეგმენტის სხვა მოთამაშეებს: Lexus, Volvo, Tesla და სხვებს - საგრძნობლად უსწრებს. Audi-ს გაყიდვებმა სექტემბერში 145,400 შეადგინა +4.5% , ხოლო წლის განმავლობაში რეალიზებული აქვს 1,357,100(-3.6%) ავტომობილი.